SHAKA: “Jukumu la kuleta maendeleo Pemba ni la wote”

Friday, August 18, 2017  

Umoja wa Vijana wa Chama Cha Mapinduzi (UVCCM) umesema kuwa Jukumu la kuleta maendeleo ya kiuchumi katika jamii ni la kila mwananchi sio jukumu la serikali pekee.

UVCCM imesema kuwa jukumu la serikali ni kuwaonyesha wananchi fursa zilipo na namna bora ya kuzichanganua ikiwa ni pamoja na kufanya kazi ili kukuza uchumi wa mtu mmoja mmoja na jamii kwa ujumla wake sambamba na kuwezeshwa kupata mikopo katika vikundi vyao vya ujasiriamali.

Kauli hiyo imetolewa na Kaimu Katibu Mkuu wa Umoja wa Vijana wa Chama Cha Mapinduzi (UVCCM) Ndg Shaka Hamdu Shaka leo Agosti 16, 2017 alipokuwa akizungumza na wanachama wa Chama Cha Mapinduzi na jumuiya zake katika mkutano wa ndani uliofanyika katika ukumbi wa Jamhuri Wilayani Wete, Mkoa wa Kaskazini Pemba. 

Alisema kuwa vijana ni nguvu kazi ya Taifa hivyo wanapaswa kutumia nguvu zao vizuri kwa kufanya kazi ili kujikwamua kiuchumi katika familia zao badala ya kukaa maskani kujadili mambo yasiyokuwa na tija kwao.

Aliongeza kuwa UVCCM inaunga mkono vijana kukaa maskani kwa maslahi mapana ya mjadala wa Maendeleo yatakayopelekea kujikwamua kiuchumi ikiwa ni pamoja na kujiunga katika vikundi mbalimbali vya ujasiriamali.

Shaka alisema kuwa  Kila mwananchi kwa nafasi yake anatakiwa kuwajibika kwa nafasi aliyonayo ndani ya chama ama serikali kwani wananchi wanataka maendeleo ya uchumi wao sio ahadi hewa za majukwaani. 

Aidha, alisema kuwa Serikali ya Chama Cha Mapinduzi inayoongozwa na Rais wa Jamhuri ya Muungano wa Tanzania Mhe Dkt John Pombe Magufuli ipo pamoja na watanzania wote ambao ni wanachama wa Chama Cha Mapinduzi ama wale ambao sio wanachama wa vyama vya siasa kwani mchakato wa maendeleo hauangalii itikadi za vyama vya siasa. 

Alisema wananchi wanatakiwa kutumia Tunu ya amani, umoja na mshikamano uliopo nchini kufanya shughuli za maendeleo na kujiepusha na maneno ambayo yataleta chokochoko za kuondoa mshikamano katika jamii.

Shaka alisema kuwa vijana wanatakiwa kujiajiri katika ujasiriamali kwa kuchukua hatua za makusudi za kujiajiri kwani kusubiri ajira za serikali zitawachelewesha na pengine kufikia hatua ya uzee pasina kuajiriwa kutokana na uchache wa ajira serikalini na wingi wa vijana. 

Kaimu Katibu Mkuu wa umoja wa Vijana UVCCM ameanza ziara ya kikazi jana Agosti 15, 2017 visiwani Pemba ikiwa ni sehemu ya utekelezaji wa ilani ya ushindi ya Chama Cha Mapinduzi ya mwaka 2015-2020.